Мухтор Авезов (1897–1961) — қозоқ ёзувчиси, драматург ва олим. У Семипалатинск вилоятидаги Чингизтов этакларида туғилган. Адибнинг энг машҳур асари — буюк қозоқ шоири Абай ҳаётига бағишланган тўрт жилдлик «Абай йўли» роман-эпопеяси. Бу асар «Жаҳон адабиёти кутубхонаси» туркумига киритилган. Авезов Қозоғистон Фанлар академиясининг академиги (1946), Ленин мукофоти (1959) ва Давлат мукофоти (1949) лауреати бўлган. У 1961 йилда Москвада вафот этган.
